WOORDE: Alma Viviers
Al hoe meer kunstenaars en ontwerpers besluit om kragte saam te span. Conrad Botes en Paco Pakdoust het pas saam ’n woltapyt vir Source gemaak wat weer eens bewys twee koppe is beter as een.
Kruisbestuiwing en die ontwikkeling van nuwe produkte is waarna Trevyn en Julian McGowan van Source altyd op soek is, en daarom vra hulle dikwels uiteenlopende kreatiewe mense om saam stukke te ontwerp vir die jaarlikse Southern Guild-versameling.
Vanjaar het die tapytkenner Paco Pakdoust en kunstenaar Conrad Botes saam gesorg vir ’n groot ronde tapyt met een van Conrad se kenmerkende portretkunswerke daarop. Die tapyt, met die titel “Haunted” (foto bo), is 3 m in deursnee en gemaak van wol uit die Tibettaanse hoogland.
“Die samewerking is ’n goeie geleentheid om te wys watter ongelooflike werk meesterwewers doen,” sê Paco. “Die resultaat is ’n groot sukses en het gelei tot ons jongste versameling, Rug Revolution.
“Samewerking tussen ontwerpers, kunstenaars en groot handelsmerke is hoogmode, byvoorbeeld Issey Miyake wat ’n waterbottel vir Evian ontwerp het. Dis baiekeer net ’n bemarkingsfoefie, maar soms kry jy iets wat werklik nuut en oospronklik is,” sê hy.
• Southern Guild 044 877 0719, www.southernguild.co.za
• Paco Rugs 011 486 0542, www.pacorugs.co.za
