-
’n Magdom kleure en teksture : “The Dying Slave” se mosaïek-oppervlak van 42,6 vierkante meter bestaan uit 225  000 tesserae (klein teëltjies) wat met die hand gesny is. Altesame 1 500 kg materiaal is gebruik — van kalksteen en marmer tot graniet en klippies. -
Hard aan die werk in die Kaaptadse ateljee : Spier Architectural Arts het ’n ogie gehou oor elke stap in die ontwerp- en konstruksieproses. Dit het ingesluit die ontwikkeling van die ontwerp, die keuse van materiale en ’n geskikte styl van mosaïekwerk, en oorsig oor die oprigting van die werk. -
Spanwerk : Die produksie is in die ateljee in Kaapstad afgehandel waar dit 10 mosaïekkunstenaars vyf maande geneem het om die werk te voltooi. -
Stukkie vir stukkie : Die mosaïekwerk is geskep in panele van 1 vierkante meter. -
Delikate kuns : Die panele is daarna in kratte na die wynlandgoed geneem waar ’n span van vier kunstenaars dit naatloos aan die groot panele geheg het. -
Voor en agter : Die mosaïekpanele is aan albei kante van die groot panele geïnstalleer sodat die beeld aan die voor- en agterkant van die installasie sigbaar is. -
’n Verbyganger bewonder die strukture : Op ’n afstand kom die nege panele in lyn om die volledige prent van “The Dying Slave” te onthul. Die panele is 4,2 meter hoog en dek ’n gebied van 30 vierkante meter.
FOTO’S Micky Hoyle WOORDE Malibongwe Tyilo en Liani van der Westhuizen
’n Kunsinstallasie by die Spier-wynlandgoed in die Stellenbosse wynland herinner ’n mens dat kuns nie tot galerye beperk hoef te wees nie. Dié grootskaalse werk deur Marco Cianfanelli bestaan uit ’n mosaïekbeeld op nege hoë panele wat kuns tot argitektuur verhef. Dit verleen ook ’n funksionele kwaliteit aan die werk en nooi toeskouers om hulleself as’t ware in die kunswerk te werp.
“The Dying Slave” deur Marco Cianfanelli is opgerig by die kruising van twee wandelpaadjies op die Spier-wynlandgoed. Net soos Marco se veelgeprese Madiba-installasie bestaan dié werk ook uit verskillende panele wat saam ’n prentjie vorm.
Marco het sy grootskaalse beeld gegrond op Michelangelo se bekende figuur van ’n manlike slaaf in sy sterwensoomblikke. Hy het ’n foto gebruik, maar die beeld digitaal geskep en in pixel-lyne verdeel wat in mosaïek herskep is deur kunstenaars van die Spier Arts Academy. Die doel met dié skool is om opleiding én werksgeleenthede in kontemporêre mosaïekwerk te verskaf.
“Ek was aanvanklik bekommerd dat die rowwe gevoel van die klipmosaïek wat gebruik word, nie sou werk om ’n gladde diditale effek te skep nie,” sê Marco. “Maar nadat ek die eerste voorbeeld gesien het wat in die ateljee geskep is, het ek besef die ryk tekstuur en die intense kleur van die glas pas perfek by die konsep.”
www.spier.co.za/thedyingslave/index.htm, spierarchitecturalarts.com
